50:0: гэта лік не рэгбійнага, а футбольнага матча ў беларускім чэмпіянаце

«Мёры» выдалі «прыгожы» вынік у матчы з «Расонамі».

У чэмпіянаце Беларусі ў футболе ў другой лізе адна каманда забіла іншы 50 мячоў, сама не прапусціўшы ніводнага, паведамляе сайт Bel.Football. У матчы сустракаліся дзве каманды з Віцебскай вобласці: «Мёры» на сваім полі прымалі «Расоны».

Такі фенаменальны вынік зафіксаваны на фоне дзіўнага спаборніцтва паміж кіраўніцтвам Міністэрства спорту і турызму (міністрам зараз з'яўляецца Сяргей Кавальчук) і Беларускай федэрацыі футбола (АБФФ) на чале з былым старшынёй Віцебскага аблвыканкама Мікалаем Шарстнёвым, якое не адбываецца дзесьці кулуарна пад схаваным дываном, а выйшла на ўсеагульны агляд, піша «Наша ніва»:

Міністэрства і федэрацыя сярод іншага не могуць разабрацца, хто з іх мусіць арганізоўваць спаборніцтвы ў другой футбольнай лізе і якім павінен быць фармат гэтага турніру. Не прыйшоўшы да згоды, кожная са структур спрабуе арганізаваць спаборніцтвы пад сваёй эгідай, а канкурэнту ставіць палкі ў колы. Так, міністэрства 29 красавіка выпусціла наступную заяву:

Паведамляем, што згодна з рэспубліканскім каляндарным планам правядзення спартыўных мерапрыемстваў АБФФ не зʼяўляецца арганізатарам чэмпіянату Рэспублікі Беларусь у футболе 2024 года сярод мужчынскіх каманд другой лігі, паколькі яго арганізатарам выступаюць Міністэрства спорту і турызму і ўпаўнаважаныя ім арганізацыі. Правядзенне АБФФ аналагічнага мерапрыемства зʼяўляецца недапушчальным і выходзіць за межы яе паўнамоцтваў».

Аднак у канцы мінулага тыдня спаборніцтвы ў другой лізе пад эгідай АБФФ усё ж фармальна стартавалі. Але пад ціскам міністэрства каманды ў іх адмаўляюцца гуляць, таму на гэты момант з дзесяці запланаваных матчаў адбыўся толькі адзін. А «прыгожы» вынік 50:0 зафіксаваны ў альтэрнатыўным турніры, які спрабуе зладзіць міністэрства.

3 мая АБФФ распаўсюдзіла прэс-рэліз, згодна з якім усе гульні другога тура пераносяцца на больш позні тэрмін. А ў найбліжэйшы панядзелак адбудзецца пазачарговае паседжанне выканкама АБФФ у пытанні фармату другой лігі. У нарадзе возьмуць удзел і прадстаўнікі Мінспорту. Магчыма, пасля гэтага бакі прыйдуць да нейкай згоды.

Хаця пытанне правядзення чэмпіянату ў другой лізе – не адзінае, якое выклікае рознагалоссі. Таксама бакі абвінавачваюць адзін аднаго ў фінансавых праблемах клубаў.