Экспарт нафтапрадуктаў з Расеі абрынуўся да сямігадовага мінімуму

Значнае скарачэнне па ўсіх пазіцыях.

Напады ўкраінскіх беспілотнікаў на расейскія нафтаперапрацоўчыя заводы (НПЗ) прывялі да значнага скарачэння экспарту нафтапрадуктаў.

У красавіку Расея экспартавала з партоў на 24% менш мазуту, чым год таму. Пры гэтым у дачыненні да сакавіка пастаўкі знізіліся на 11%, да 815 тысяч барэляў за дзень. Гэта вынікае са звестак аналітычнай кампаніі Kpler, якія прыводзіць РБК.

Таксама ўпаў марскі экспарт нафты (бензін простагонны) - на 20% год да года і на 15% у дачыненні да папярэдняга месяца. Увогуле было экспартавана 322 тыс. барэляў за дзень.

Працягнуў скарачацца і марскі экспарт дызеля: у красавіку ён быў на 28% ніжэйшы, чым год таму, і на 23% меншы, чым у сакавіку, дасягнуўшы 762 тысяч барэляў за дзень. Аб'ём паставак дызеля на знешнія рынкі паслядоўна змяншаецца з лютага. Пры гэтым яшчэ ў студзені ён складаў 1,15 млн барэляў за дзень. У той жа час урад забараніў экспарт бензіну з Расеі на паўгода з 1 сакавіка.

Прадстаўленыя паказчыкі сталі "самымі нізкімі з моманту назірання, гэта значыць як мінімум з 2017 года", адзначыў кіраўнік аналізу нафтавых рынкаў Kpler Віктар Катон. “Накладванне сезона рамонтаў і адсутных магутнасцяў пасля ўкраінскіх нападаў дронамі вылілася ў найслабейшы месяц для расейскага экспарту нафтапрадуктаў”, - растлумачыў экспэрт.

З пачатку 2024 года Украіна стала мэтанакіравана біць дронамі па аб'ектах паліўна-энэргетычнага комплексу (ПЭК) Расеі. За чатыры месяцы расейскія НПЗ і нафтабазы былі атакаваныя не менш як 20 разоў. Пад ударамі апынуліся ўсе буйныя заводы ў еўрапейскай частцы Расеі. Апошняя з атак адбылася 1 траўня на найбуйнейшым НПЗ у Цэнтральнай Расеі - Разанскі нафтаперапрацоўчы завод "Раснафты".

У выніку сістэматычных удараў беспілотнікаў перапрацоўка нафты ў Расеі рэзка скарацілася. Паводле апошніх звестак Расстата, у сакавіку вытворчасць бензіну ўпала на 3,5% у параўнанні з лютым і на 7,9% да аналагічнага перыяду мінулага года. Вытворчасць дызеля, наадварот, вырасла да лютага на 5,4%, але знізілася на 5,7% год да года. У абсалютным вылічэнні паказчыкі ў першым квартале склалі 11 млн. тон (зніжэнне на 1,3%) і 21,9 млн. тон (зніжэнне на 2,2%) адпаведна.

Выпуск мазуту ў сакавіку знізіўся на 7,9 адсотка да лютага і на 22,2 адсотка да сакавіка мінулага года. Усяго за першы квартал ён скараціўся на 11,6%, да 9,7 млн тон. Вытворчасць нафты вырасла ў сакавіку на 41,6 адсотка да лютага, але скарацілася на 22,2 адсотка да сакавіка 2023 года. Усяго за першыя тры месяцы 2024 года яна склала 2 млн тон, што на 32,7% ніжэй за аналагічны паказчык 2023 года.

У канцы красавіка Мінэнэрга заявіла, што вытворчасць бензіну і дызельнага паліва ў краіне стабілізавалася, пастаўкі на ўнутраны рынак перавышаюць аб'ёмы мінулага года, а экспарт зніжаны. Ва ўрадзе разлічваюць на заканчэнне ўсіх пазапланавых рамонтаў на НПЗ у красавіку-траўні, казаў міністр энэргетыкі РФ Мікалай Шульгінаў.