Улады прапанавалі бізнэсоўцам «адкупіцца»?

Бізнэсоўцам прапануюць папярэдне ўнесці на спецрахункі 50 тысяч рублёў, каб у будучыні не патрапіць у следчы ізалятар.

Рэдактар «Эканамічнай газеты» Леанід Фрыдкін апублікаваў артыкул, у якім паведамляе аб магчымым увядзенні дэкрэта «Пра забеспячальны дэпазіт», піша сайт nn.by.

Згодна з праектам дэкрэта, кожны бізнэсовец зможа пакласці на спецыяльны рахунак у «Беларусбанку» не менш за 50 тысяч рублёў. Гэта будзе забеспячальны дэпазіт для гарантавання кампенсацыі прычыненай парушэннем шкоды. Прычым такі дэпазіт можна адкрыць і на сваё імя, і на ўсякую іншую асобу.

Калі ў будучыні ў дачыненні да бізнэсоўца будзе заведзеная крымінальная справа паводле «эканамічнага артыкула», яе разгляд адбудзецца паводле спрошчанай працэдуры, без затрымання і ўзяцця пад варту.

Гаворка ідзе пра такія злачынствы, як прычыненне маёмаснай шкоды без прыкметаў крадзяжу (арт.216 КК), кантрабанда (арт.228 КК), незаконнае перамяшчэнне тавараў праз мяжу (арт.2281 КК), ухіленне ад выплаты мытных аплатаў (арт.231 КК ), незаконная прадпрымальніцкая дзейнасць (арт.233 КК), легалізацыя (адмыванне) сродкаў, атрыманых злачынным шляхам (арт.234 КК), набыццё або збыт матэрыяльных каштоўнасцяў, заведама здабытых злачынным шляхам (арт.237 КК), утойванне банкруцтва (арт.239 КК), ухіленне ад выплаты падаткаў (арт.243 КК), перавышэнне ўлады або службовых паўнамоцтваў (ч.1 арт.426 КК), службовая халатнасць (арт.428 КК), а таксама адміністрацыйных правапарушэнняў, прадугледжаных кіраўнікамі 11-14 КаАП.

Пры наяўнасці падстаў для распачынання крымінальнай справы праваахоўнікі высвятляць, ці ёсць у парушальніка забеспячальны дэпазіт. Калі ён ёсць, і сумы дастаткова для кампенсацыі шкоды, то крымінальная справа не распачынаецца. У такім выпадку праваахоўнікі прымаюць пастанову і здымаюць частку сродкаў з рахунку ў даход дзяржавы.

Адначасова пастанова накіроўваецца даўжніку-бізнэсоўцу, які цягам 20 дзён павінен выплаціць у бюджэт кампенсацыю сумай 30% сумы шкоды. У адваротным выпадку гэтую суму спагоняць прымусова судовыя выканаўцы.

Калі ж грошай на рахунку не дастаткова для кампенсацыі шкоды, то крымінальную справу ўсё ж распачнуць. Але на час разбіральніцтва змяшчаць бізнэсоўца ў СІЗО не стануць.

А тэрмін або сума пакарання не будуць перавышаць паловы максімальнага тэрміну або сумы найбольш строгага пакарання паводле артыкула.