Кіроўца скраў дырэктарскі сейф у Менску і павёз на таксі ў Жлобін

Выдаткаваць грошы хлопец не паспеў.

Паводле падазрэння ў крадзяжы сейфа з грашыма са сталічнага офіса затрыманы кіроўца гэтай фірмы, паведамляе «Минск-Новости».

- У міліцыю звярнуўся дырэктар кампаніі. Ён паведаміў, што, прыйшоўшы раніцай на працу, не выявіў у офісе сейфа. Устаноўлена, што напярэдадні 23-гадовы кіроўца фірмы таемна зрабіў сабе дублікат ключа ад памяшкання. Пракраўшыся ўначы, дастаў сейф з шафы, паклаў яго ў вялікую сумку для лодкі, а затым на таксі паехаў дадому ў Жлобін, - распавяла афіцыйная прадстаўніца Фрунзенскага РУУС Наталля Аскірка.

Ужо ў гаражы малады чалавек узламаў замок сейфа, які пазней ўтапіў у рацэ, і дастаў грошы - 850 даляраў ЗША і 24 000 беларускіх рублёў. Выдаткаваць іх не паспеў - у абед таго ж дня яго затрымалі аператыўнікі.

У дачыненні да зламысніка распачатая крымінальная справа паводле арт. 205 («Крадзеж») КК Рэспублікі Беларусь.