Пераемніца Маці Тэрэзы ў Гомелі: Майце свет у сабе і перадавайце яго іншым людзям

Сястра Марыя Прэм Перык наведала Дом міласэрнасці і касцёл.

11-12 снежня Гомель наведвала Генеральная ігумення кангрэгацыі «Місіянерак любові» (ордэна святой Маці Тэрэзы). Цяперашняя кіраўніца кангрэгацыі - сястра Марыя Прэм Перык, трэцяя Генеральная ігумення і пераемніца Маці Тэрэзы - упершыню прыязджала ў Беларусь, піша katolik.life.

Раніцай 12 снежня госця ўдзельнічала ў раратней святой Імшы і пазнаёмілася з мясцовым прыходам. Нагадаем, за дзень да прыезду ў Гомель Генеральная ігумення наведвала дамы кангрэгацыі ў Расеі. Як распавяла сястра, яе ўразіла Беларусь:

- Маім першым уражаннем было тое, што гэта вялікая краіна, я рада, што мы можам служыць тут, што тут нас любяць і добра прымаюць наша служэнне. Як у Расеі, так і ў Беларусі і ва ўсім свеце мы выконваем практычна аднолькавае служэнне, і я бачу, што тут у людзей ёсць жаданне, прага даведацца пра Бога, наблізіцца да Яго, і сёстры дапамагаюць гэта рабіць, больш любіць Бога.

У Гомелі сястра Прэм прабыла паўтара дня, яна прыязджала, каб пабыць разам з сёстрамі, паглядзець на іх працу. Амаль увесь гэты час Генеральная ігумення праводзіла ў Доме міласэрнасці, каб надаць час кожнай з манашак, якія служаць тут. Пры ад'ездзе сястра Прэм пажадала мужнасці сёстрам і папрасіла, каб яны неслі святло Ісуса, мелі яго ў сабе і перадавалі ўсім людзям, з якімі сустракаюцца.

Цяпер Генеральная ігумення зноў вяртаецца ў Расею, а затым - на Каляды - далучыцца да сясцёр у Літве. Падчас Адвэнту яна здзяйсняе паездкі па ўсіх 17 дамах міласэрнасці ордэна, якія ўваходзяць у правінцыю, якая ўключае Расею, Беларусь і Літву.

Нагадаем, у гомельскім Доме міласэрнасці - адзіным у Беларусі месцы знаходжання сясцёр Маці Тэрэзы - ужо больш за 20 гадоў служаць пяць-шэсць манашак з розных краін свету: Індыі, Польшчы, Філіпін. Тут кормяць і лечаць бедных і бяздомных, дапамагаюць праблемным і шматдзетным сем'ям.

Апошнім разам Генеральная ігумення ордэна, тады - сястра Нірмала, прыязджала ў Гомель у 2000 годзе. 64-гадовая немка Марыя Прэм Перык – трэцяя Генеральная ігумення ордэна пасля святой Маці Тэрэзы і сястры Нірмалы Джош з Індыі. Падчас наведвання Маці Тэрэзай Ватыкана сястра Прэм дапамагала ёй у якасці перакладчыцы.

Кангрэгацыя сясцёр «Місіянерак любові» была заснаваная Маці Тэрэзай у 1948 годзе ў Калькуце ў Індыі. Мэтай яе заснавання стала дабрачынная дзейнасць сярод абяздоленых жыхароў Калькуты незалежна ад іх веравызнання і нацыянальнасці. Манашкі кангрэгацыі прысягаюць на паслушэнства, міласэрнасць, беднасць і служэнне найбяднейшым з бедных. Паводле статуту, напісанаму Маці Тэрэзай, яны павінны жыць, падобна іх падапечным, у абсалютнай галечы.