19-гадовы берасцеец стварыў IT-праект, які не мае аналагаў у свеце

У родным горадзе Антона Любохінца называюць мясцовым Ілонам Маскам.

Пакуль Міністэрства адукацыі спрашчае праграму для школьнікаў, у Берасці ўчорашнія вучні ствараюць карысныя IT-праекты, якія да іх яшчэ ніхто не прыдумляў. Гаворка пра Антона Любохінца, цяпер студэнта берасцейскага тэхнічнага ўніверсітэта, які разам з сябрамі ўжо пачаў тэставаць праграму з дадатковай рэальнасцю Report, піша kyky.org.

У родным горадзе Антона называюць мясцовым Ілонам Маскам, хлопцу такое параўнанне, мабыць, падабаецца: «20 гадоў таму над прапановамі Ілона адкрыта смяяліся. «Ды ты проста чалавек, сядзь і супакойся», - казалі яму. Але ён не супакоіўся, а стварыў кампанію вытворчасці электрычных аўтамабіляў Tesla. Калі ўсё атрымаецца, то пачнецца эпоха касмічнага турызму і на Марсе з'явяцца першыя калоніі людзей», - кажа Антон, а потым называе свае ж праекты - звычайнымі.

Чым ужо адзначыўся 19-гадовы хлопец з Берасця

А бо хлопец і праўда сапраўдны талент: будучы школьнікам Антон стварыў сэнсарную пальчатку, для слабавідушчых людзей: «Прылада працуе па прынцыпе рэхалота і агучвае ўслых, што знаходзіцца побач. Таксама ў маёй прыладзе ёсць камера: калі чалавек падносіць яе, напрыклад, да бутэлькі малака, то пальчатка гучна паведамляе, што напісана на этыкетцы».

Праектам сур'ёзна зацікавіліся сваякі інвалідаў па зроку з Беларусі. Тэлефанавалі хлопцу, пыталіся, дзе яе можна купіць. Антон і сам хацеў наладзіць вытворчасць, але, пасля падлікаў выдаткаў, энтузіязм у хлопца прапаў: «Каб зрабіць эксперыментальную партыю з дзесяці штук, мне спатрэбілася б блізу сямі тысяч даляраў».

У выніку інвестар не знайшоўся, а спробы хлопца знайсці звычайных хлопчыкаў і дзяўчынак, якія, як і ён будуць збіраць пальчатку з дэталяў, якія можна замовіць на кітайскім сайце, - праваліліся. Праз шэсць гадоў пакут, Антон проста вырашыў паступіць ва ўніверсітэт.

Што такое Report і як ён працуе

Паступіў і стварыў новую праграму: Report, якая дазваляе перадаваць відэа, тэкст і фота на адлегласці па запыце яе карыстальнікаў. Яе карыснасць у тым, што чалавек можа даведацца, што цяпер адбываецца там, дзе няма тваіх знаёмых, але ёсць карыстальнікі Report.

Просты прыклад: хоча дзяўчына купіць сабе сукенку, але заказваць у інтэрнэт-краме - не будзе, бо памер можа не падысці, а на звычайны шопінг - часу няма. Яна адпраўляе запыт у Report і, у разуменні Антона, прадаўцы найбліжэйшых да яе крам пішуць, што нешта такое яна можа памераць у іх.

Антон, мабыць, правёў працу над памылкамі: у яго новай праграмы ўжо ёсць інвестар і маскоўскі эксперт, які займаецца прасоўваннем праграмы. Рэліз праекту запланаваны на вясну гэтага года: «Мы прапануем вядомым блогерам шукаць кантэнт для сваіх публікацый праз наш сэрвіс. Адказы будуць падказваць іх жа падпісчыкі. Потым блогеры пішуць свае ўражанні. Пры гэтым наша галоўная задача - сачыць за рэакцыяй карыстальнікаў і рабіць высновы», - распавядае берасцеец.

Паралельна з тэставаннем Report, Антон і яго каманда ўжо займаюцца распрацоўкай новага праекта: мабільнай праграмы-памочніка турыстаў на чэмпіянаце свету па футболе.

І тут хлопцы падумалі пра фінансавы складнік: збіраюцца праз дапоўненую рэальнасць рэкламаваць брэнды. Пры дапамозе тэхналогіі нейронных сетак і машыннага бачання будуць накладваць рэкламу розных брэндаў на карту або відэатрансляцыі: «Ідэя размяшчаць лагатыпы кампаній, кантактныя звесткі фірмаў і іншую рэкламную інфармацыю на фасадах будынкаў з'явілася, калі я працаваў у адной берасцейскай кампаніі. Мы запусцілі праект «Тэлепорт», дзе з дапамогай усталяваных у горадзе камер на 360 градусаў стваралі онлайн-гід. Бізнэс актыўна згаджаўся ўстаўляць у трансляцыі сваю рэкламу. І ў нас нават адкрылася прадстаўніцтва ў Казахстане: пункты з онлайн-трансляцыямі сёння працуюць у Астане і Алма-Аты», - распавядае хлопец.

Пакуль што гэта ўсё ідэі, якія малады чалавек адважыўся агучыць у СМІ. Давайце ж яму пажадаем поспеху і паверым, што ў Антона ўсё атрымаецца.