На Марсе выявілі лядзяныя скалы з вялікімі запасамі вады

Структура лёду дазволіць навукоўцам вывучыць гісторыю марсіянскага клімату.

Амерыканскія навукоўцы заявілі, што ў іх атрымалася выявіць вялікія паклады вадзянога лёду пад паверхняй сярэдніх шыротаў Марса. Лядзяныя шчыты могуць дасягаць таўшчыні 100 метраў, пры гэтым многія з іх залягаюць зусім не глыбока – на глыбіні 1-2 метраў. У перспектыве гэты лёд зможа стаць крыніцай вады для будучых марсіянскіх місіяў, а таксама расказаць пра гісторыю змяненняў клімату планеты. Пра гэта паведамляе інтэрнэт-выданне Naked Science са спасылкай на даследаванне, апублікаванае ў часопісе Science, паведамляе liga.net.

Марс валодае значнымі запасамі лёду. Самыя прыкметныя з іх – палярныя шапкі, размешчаныя вакол палюсоў планеты. У сярэдніх шыротах планеты ёсць паклады лёду, але раней меркавалася, што яны не дасягаюць паверхні, праз нізкі атмасферны ціск вада, якая растае, хутка выпараецца.

Аўтары новай працы прыйшлі да высновы, што і ў сярэдніх шыротах лёд можа выглядваць з-пад цвёрдай паверхні планеты. Гэтая выснова заснаваная на выніках назіранняў аўтаматычнай міжпланетнай станцыі Mars Reconnaissance Orbiter (MRO). Навукоўцы выявілі восем месцаў у сярэдніх шыротах Марса, дзе лёд выходзіць вонкі. У гэтых кропках узвышаюцца стромыя скалы, збольшага разбураныя эрозіяй. На зломе скалаў на здымках відаць блакітны лёд з прыкметнымі пластамі. Даследаванні з дапамогай спектрометра CRISM паказалі, што ў складзе фрагментаў прысутнічае вада, пакрытая вельмі тонкім пластом пылу.

MRO рабіў здымкі цягам трох марсіянскіх гадоў, на Зямлі ў гэты час прайшло пяць гадоў і сем месяцаў. Кожнае лета бачныя фрагменты лёду трохі памяншаліся, але не знікалі да канца. Навукоўцы выказалі здагадку, што гэтыя фрагменты звязаныя з вялікімі падпаверхневымі пакладамі вадзянога лёду. Мяркуючы з прыкметных слаёў і пражылак у лёдзе скалаў, гэты лёд стварылі моцныя снегапады. Пласты паступова нарасталі і злежваліся ў адзіную масу – так паўсталі і многія ледавікі на Зямлі. Аўтары працы мяркуюць, што ў перспектыве з дэталёвых здымкаў гэтых слаёў можна будзе аднавіць некаторыя кліматычныя працэсы далёкага мінулага Чырвонай планеты.