Беларусы замацаваліся ў ліку лідараў «Дакара»

Закончыўся шосты этап юбілейнага ралі-рэйду «Дакар».

Каманда «МАЗ-СПОРТаўта» адносна добра прайшла шосты этап юбілейнага ралі-рэйду «Дакар». Экіпаж Сяргея Вязовіча на трасе абагнаў КамАЗ Айрата Мардзеева і паказаў на фінішы сёмы час, захаваўшы трэцюю пазіцыю ў агульным заліку, апавялі tut.by у ААТ «МАЗ».

Шосты этап уключаў два хуткасныя адрэзкі ў розных краінах – Перу і Балівіі. Упершыню на цяперашнім «Дакары» гоншчыкам давялося сутыкнуцца з горнымі адрэзкамі. Разам з тым першая дзясятка экіпажаў праехала маршрут у высокім тэмпе і з невялікім адставаннем адзін ад аднаго.

«Абодва спецадрэзкі былі на вышыні 4000 метраў над узроўнем мора. Сяргей Вязовіч ішоў у ліку першых і абышоў экіпаж Айрата Мардзеева на першым адрэзку. Пры гэтым моцна не рызыкаваў: важна было ўтрымацца ў першай тройцы генеральнай класіфікацыі і не саступіць у часе экіпажам, якія ідуць следам. Асноўная задача – утрымліваць спаборнікаў на адлегласці, каб адчуваць сябе бяспечна, – апавялі ў кампаніі velcom, якая забяспечыла камандзе бясплатную мабільную сувязь. – Разыначкай этапу стала канцоўка ў цемры па вузкай дарозе з каляінамі. Увогуле выдалася даволі небяспечнае прыгода».

Сяргей Вязовіч правёў на трасе 3 гадзіны 28 хвілінаў, заняўшы сёмае месца. Пераможцам этапу стаў аргенцінец Федэрыка Вілагра, якому беларусы саступілі 6 хвілінаў. У «абсалюце» МАЗаўскі экіпаж займае трэці радок і саступае лідару гонкі – расейцу Эдуарду Мікалаеву – 2 гадзіны 24 хвіліны.

Упэўнена прайшоў этап і Аляксей Вішнеўскі, які фінішаваў 12-м. Ягоны час – 3 гадзіны 45 хвілінаў, а адставанне ад пераможцы – 23 хвіліны. У агульным заліку экіпаж знаходзіцца на 18-й пазіцыі.

Аляксандр Васілеўскі закончыў сёмы ралі-заезд на 21-м месцы, выдаткаваўшы на маршруце больш за 5 гадзінаў і «аддаўшы» аргенцінцу 1 гадзіну 45 хвілінаў. У генеральнай класіфікацыі экіпаж займае 15-ы радок з адставаннем 11 гадзінаў 10 хвілінаў.

Пасля шостага этапу гоншчыкаў чакае заслужаны дзень адпачынку, які яны правядуць у Ла-Пасе. Гэты час можна будзе выдаткаваць на рамонт аўтамабіляў і падрыхтоўку да наступных ралі-заездаў. Сёмы этап прывядзе экіпажы ў балівійскі горад Уюні. Даўжыня спецадрэзку, які пройдзе ў горнай мясцовасці, складзе вялікія 369 км.