У Баранавічах мянчанка збіла кантралёрку
7- 8.11.2018, 17:21
- 19,234
Распачатая крымінальная справа.
У Баранавічах 30 кастрычніка, блізу 18.30, два кантралёры-рэвізоры правяралі ў аўтобусе дакументы на праезд. На прыпынку «Аўтавакзал» кантралёрка затрымала за безбілетны праезд жыхарку Менска, распавялі intex-press.by ў прэс-службе УУС Берасцейскага аблвыканкама.
Жанчына штурхнула кантралёрку, кулаком ударыла па правай шчацэ, а пасля стала выкручваць ёй рукі і ўдарыла сумачкай па твары.
На месца здарэння прыбылі міліцыя і хуткая дапамога.
6 лістапада ў дачыненні да мянчанкі была распачатая крымінальная справа на падставе ч.1 арт.366 КК РБ («Гвалт альбо пагроза ў дачыненні да службовай асобы, якая выконвае службовыя абавязкі, або іншай асобы, якая выконвае грамадскі абавязак»). Санкцыя артыкула прадугледжвае пакаранне ад штрафу да пяці гадоў пазбаўлення волі.