Ларыса Шчыракова: Міліцыі прымроілася «незаконнае інтэрв'ю»
3- 24.04.2018, 16:49
- 12,336
Незалежная журналістка ўважае абвінавачванні ў пратаколе за недарэчныя.
24 красавіка суддзя Светлагорскага раёна Руслан Царук перанёс разгляд судовай справы гомельскай журналісткі-фрылансеркі Ларысы Шчыраковай з прычыны недарэчных абвінавачванняў у адміністрацыйным пратаколе, піша сайт baj.by.
Пратакол паводле артыкула 22.9 КаАП склаў старшы лейтэнант міліцыі Алег Каўцэвіч. У ім паведамляецца, што 9 сакавіка а 8 гадзіне раніцы Шчыракова незаконна брала інтэрв’ю ў жыхароў вёскі Якімава Слабада Светлагорскага раёна.
«Чарговы цырк. Далібог, у гэты час я мірна спала ў сябе дома», - адзначыла Ларыса Шчыракова, не стрымліваючы смеху.
Журналістку абвінавачваюць таксама ў тым, што відэаінтэрв'ю яна размясціла ў «Навінах» на тэлеканале «Белсат». Аднак, такой праграмы на тэлеканале не існуе.
Суддзя перанёс разгляд адміністрацыйнай справы на 27 красавіка, каб выклікаць з тлумачэннямі ў суд аўтара пратаколу старэйшага лейтэнанта міліцыі Каўцэвіча.