У Гомелі забунтавалі жыхары 33 дамоў прыватнага сектара

Гомельскі УКБ плануе знесці дамы і пабудаваць на іх месцы шматпавярхоўкі.

Пра тое, што іх дамы плануюць знесці, жыхары Навабеліцкага раёна Гомеля даведаліся выпадкова з нататкі ў мясцовай газеце, піша gomel.today. Дагледжаныя, камфортныя, адрамантаваныя 33 дамы на невялікім кавалку вуліцаў Герцэна, Урыцкага, Радзішчава і Дзімітрава раптоўна пастанавілі замяніць на чатыры шматпавярхоўкі.

Мясцовыя жыхары б'юць трывогу – чаму перш, чым прыняць такую пастанову, іх ніхто не спытаў? Адміністрацыя раёна і забудоўнік пастанавілі правесці грамадскае абмеркаванне.

У актавай зале адміністрацыі Навабеліцкага раёна не змаглі змясціцца ўсе прысутныя. Ініцыятыўная група, якая складаецца з уласнікаў прыватных дамоў, з раніцы і да позняй ночы абыходзіла не толькі суседзяў, але нават тых мясцовых жыхароў, якіх будучае ўшчыльненне вуліц тычыцца ўскосна. Яны праводзілі анкетаванне, у якім спрабавалі сабраць адзінае меркаванне пра ўзніклую праблему – пераважная большасць апынулася катэгарычна супраць будучай забудовы.

Тое, што змяняецца функцыянальнае прызначэнне тэрыторыі, на якой стаяць гэтыя 33 дамы, мясцовыя жыхары даведаліся выпадкова. Знаёмыя вычыталі ў газеце пра знос і патэлефанавалі з пытаннем «А вы ведаеце, што вас знясуць?». Не трэба тлумачыць, у якім шоку апынуліся ўласнікі дамоў. Іх абурыў і сам факт таго, што іх ніхто не папярэдзіў.

Нягледзячы, што абмеркаванне генплана горада праходзіла некалькі гадоў таму, абмеркаванняў менавіта пра гэты адрэзак не было. Жыхары не сталі сядзець на месцы і пачалі звяртацца ў дзяржорганы, каб высветліць усе падрабязнасці.

Першы намеснік кіраўніка aдміністрацыі раёна, Чысты Андрэй, у самым пачатку сходу, патлумачыў жыхарам, што на гэтым сходзе гаворка пойдзе не пра знос дамоў, а толькі пра інфармаванне і пра планаванне самой канцэпцыі забудовы. Але мясцовыя жыхары ўпэўненыя – што б яны цяпер ні сказалі, іхнія дамы ўсё адно знясуць.

Заказчык будаўніцтва, дзяржаўнае прадпрыемства «УКБ г.Гомеля», плануе пабудаваць на месцы прыватнага сектара чатыры 11-павярховыя дамы, з паркоўкамі і дзіцячай пляцоўкай. Дамы будуць тыпавой забудовы. Мясцовыя жыхары катэгарычна супраць – замест 33 дамоў у іх раёне стане амаль на 500 сем'яў больш. Гэта не толькі пагоршыць іхні звыклы лад жыцця, але пагоршыць сітуацыю з інфраструктурай раёна, якая ўжо цяпер не спраўляецца з колькасцю жыхароў.

Супраць будучага «папаўнення» мясцовыя жыхары называюць некалькі важкіх аргументаў: няма садоў і школаў, праблемы з транспартам, няма нармальных крамаў, паліклінікі перапоўненыя. І гэта праўда, з якой могуць паспрачацца хіба што жыхары прыгарада, дзе ўмовы жыцця ў разы горшыя.

На гэты момант у раёне, дзе плануецца знос, працуе некалькі школаў і садкоў. Але пасля пабудовы новых дамоў сітуацыя паўторыцца дакладна як у 104-мікрараёне або ў раёне «Хутар». Дамы пабудуюць як сацыяльнае жыллё, туды заселяцца маладыя сем'і, якія не змогуць аддаць сваіх дзяцей у найбліжэйшыя адукацыйныя ўстановы – усё перапоўнена ўжо цяпер.

Дарэчы, галоўны архітэктар праекта, Рагоўская Марыя, пацвердзіла, што адсутнасць новых школаў і садоў таксама можа стаць адной з галоўных прычынаў таго, што праект забудовы скасуюць.

Што тычыцца аховы здароўя ў раёне, то сітуацыя ўжо цяпер сумная. Бясконцыя чэргі, цякучка кадраў, адна дарослая паліклініка і адна дзіцячая – і гэта не толькі на раён, але і на прыгарад. Жыхары задаюцца пытаннем, што будзе пасля таго, як паставяць новыя дамы не толькі на месцы прыватнага сектара, але і пасля ўшчыльняльнай забудовы на вуліцы Піянерскай.

«Спачатку пабудуйце школу, садок і новую паліклініку! А потым будуйце свае дамы!» – хтосьці крычыць з залы. І гэта цалкам лагічна. У горадзе ўжо ёсць прыклады з пабудовамі новых раёнаў, якія апынуліся ў своеасаблівай пастцы – абяцанні забудоўнікаў пра паўнавартасную інфраструктуру не выкананыя, у садок з дзецьмі гадзіну едуць у іншыя раёны.

Крамы. Вось тут адразу ж пачынаецца хваля абурэння. Навабеліца – адзіны раён без вялікага гіпермаркета. Ды і ўвогуле без вялікай нармальнай крамы. Тут існуе своеасаблівая манаполія на гандлёвую сетку – усім «запраўляе» ТДА «Алеся».

Якасць прадукцыі, кошты і ўзровень абслугоўвання, паводле словаў мясцовых жыхароў, не найлепшыя. Усе, у каго ёсць машына, імкнуцца ездзіць па пакупкі ў былую «Лінію» або ў «МандарынПлаза». Там і зніжкі, і свежыя прадукты, і выбар. Чаго не скажаш пра крамы ў Навабеліцы. Затое аптэкі і мэблевыя крамы стаяць праз кожныя 100 метраў. Мясцовыя жыхары неаднаразова прасілі чыноўнікаў «упусціць» у раён Еўраопт. Краму адчынілі некалькі гадоў таму, але ў такім нязручным месцы, што жыхары першых 5-6 прыпынкаў у раёне адмаўляюцца туды ездзіць.

Што ж тычыцца транспарту, то ў гадзіну-пік у раёне ён заўсёды перапоўнены. Пачынаючы з прыпынку «Крышталь» грамадскія маршруты так моцна напаўняюцца людзьмі, што да «Міжнароднай» маршруткі часцяком проста праязджаюць міма, а ў аўтобусы можна хіба што на прыступкі ўлезці. Раён расце, але маршруты і колькасць грамадскага транспарту ўжо не паспяваюць за ростам колькасці жыхароў і іх патрэбаў у перамяшчэнні.

Ініцыятыўная група, якая складаецца з некалькіх уладальнікаў прыватных дамоў, падрыхтавала для сходу спіс з 10 пытанняў. Каб грамадскае абмеркаванне не перарасло ў бясконцую хвалю абурэння, на ўсе пытанні пастараліся адказаць не толькі прадстаўніца УКБ, але і кіраўнік архітэктурна-будаўнічай управы гарвыканкама, Літвінаў Юрый. Яго слухалі ўважліва, і нават пасля заканчэння абмеркавання звярталіся па кансультацыю. Усім прысутным неаднаразова нагадвалі, што на гэтай сустрэчы ідзе гаворка толькі пра планаванне пабудовы. Будуць пабудаваныя новыя дамы ці не –залежыць ад вынікаў мінулага грамадскага абмеркавання.

Пад канец сходу мясцовыя жыхары папрасілі прагаласаваць усіх, хто супраць зносу прыватнага сектара. Рукі падняла ўся зала. Падтрымала знос толькі адна жыхарка раёна.

Паводле вынікаў абмеркавання было пастаноўлена цягам двух тыдняў правесці анкетаванне мясцовых жыхароў. Вынікі будуць сабраныя ў урне, якая размяшчаецца на першым паверсе адміністрацыі Навабеліцкага раёна. Жыхароў раёна, а таксама ўладальнікаў прыватных дамоў, што плануюцца пад знос, папрасілі на паперы выкласці ўсе довады «за» і «супраць» будаўніцтва, а таксама ўнесці свае прапановы наконт канцэпцыі забудовы. Мясцовыя жыхары гатовыя далей адстойваць магчымасць жыць у дамах, у якія, як яны кажуць, «уклалі душу» і ў якіх пражылі амаль усё сваё жыццё.