Жыхары ўсходняй часткі Беларусі сталі часцей ездзіць працаваць у Польшчу, а не ў РФ
7- 19.01.2019, 21:42
- 16,011
Тэрытарыяльная блізкасць ужо ролі не адыгрывае.
У Аршанскім раёне, як у адным з самых праблемных рэгіёнаў Беларусі, па-ранейшаму існуе вялікая праблема з працаўладкаваннем. Праз гэта тысячы выхадцаў з рэгіёну шукаюць працу за мяжой, паведамляе «Радыё Рацыя».
Цяпер людзі сталі часцей ездзіць на працу ў Польшчу, пры тым што раней абсалютная большасць выбірала больш блізкую да раёна тэрытарыяльна Расею. Грамадскі актывіст з Воршы Ігар Казмерчак кажа, што такія размовы ўсё больш прыкметныя ў горадзе:
- Людзі шмат кажуць пра тое, што можна ехаць у Польшчу. У горадзе рэгулярна з'яўляюцца аб'явы пра тое, што Польшча запрашае работнікаў. Наколькі гэты вектар зменіцца прынцыпова - не ведаю, але тэндэнцыя сапраўды прыкметная: аршанцы таксама пачынаюць ездзіць у Польшчу. Ці пераможа польскі вектар расейскі, пакуль сказаць цяжка. Але ёсць, у прынцыпе, такія людзі, якія паехалі і працуюць там у лепшых умовах, чым у Расеі, зарабляюць больш і маюць усе сацыяльныя гарантыі.
Адлегласць ад Оршы да Польшчы, са слоў Ігара Казмерчака, не адыгрывае вялікай ролі. Па-першае, горад - вялікі транспартны вузел, па-другое, раней многія аршанцы ездзілі на заробкі ў больш далёкія ЗША, Чэхію, Нямеччыну.