Зяленскі паведаміў, калі будзе вядомая дата наступнага абмену

Пра гэта прэзідэнт Украіны распавёў на выставе «Зброя і бяспека».

Дата наступнага абмену зняволеных асоб паміж Украінай і РФ стане вядомая пасля сустрэчы лідараў «нармандскай чацвёркі».

Пра гэта 9 кастрычніка на выставе «Зброя і бяспека» сказаў выданню «Крым.Реалии» прэзідэнт Украіны Уладзімір Зяленскі.

«Менавіта ў нармандскім фармаце былі дамоўленасці, што падымецца самае галоўнае пытанне - гэта абмен людзей, там іх два абмены: у нас людзі, якія на тэрыторыі Расеі, якія на тэрыторыі» ДНР». Там сапраўды вялікая колькасць», - сказаў Зяленскі.

На пытанне, ці будзе зразумелая дата новага абмену пасля сустрэчы ў нармандскім фармаце, Зяленскі заявіў: «Так, я ўпэўнены ў гэтым. Чакаем».

7 верасня паміж Украінай і РФ адбыўся абмен зняволенымі асобамі ў фармаце «35 на 35». Сярод украінцаў, якія вярнуліся дадому, - палітвязні Алег Сянцоў, Аляксандр Кольчанка, Уладзімір Балух, Раман Сушчанка, Мікалай Карпюк, Станіслаў Кліх, Павел Грыб, Яўген Паноў, Артур Паноў, Эдэм Бекіраў, Аляксей Сізановіч, а таксама захопленыя Расеяй у Керчанскай пратоцы 24 маракі. Расеі выдалі 35 чалавек, сярод якіх быў і Вышынскі.

На часова акупаваных тэрыторыях Данецкай і Луганскай абласцей ўсё яшчэ незаконна ўтрымліваюць 227 украінцаў, паведамілі ў Службе бяспекі Украіны.

Паводле звестак украінскага амбудсмэна Людмілы Дзянісавай, у расейскіх турмах знаходзіцца 113 украінскіх палітвязняў, сярод якіх 89 крымскіх татараў.

Сустрэча «Нармандскай чацвёркі» павінна была адбыцца 16 верасня, Украіна, Францыя і Нямеччына былі гатовыя да правядзення саміту, але РФ не пагадзілася.

7 кастрычніка міністр замежных спраў Украіны Вадзім Прыстайка заявіў, што РФ не зацікаўленая ў сустрэчы лідараў нармандскага фармату і шукае падставы, каб не праводзіць яе.