Дзярждума РФ прыстрашыла Лукашэнку эканамічным крызісам за адмову інтэгравацца

З такой заявай выступіў намеснік старшыні камітэта Дзярждумы РФ у справах СНД і еўразійскай інтэграцыі Затулін.

Адмова ад саюзных адносін з Расеяй увядзе Беларусь у эканамічны крызіс. З такой заявай выступіў намеснік старшыні камітэта Дзярждумы ў справах СНД, еўразійскай інтэграцыі і сувязях з суайчыннікамі Канстанцін Затулін, каментуючы пастанову Аляксандра Лукашэнкі не падпісваць ніякія дакументы аб паглыбленні інтэграцыі, які пазбаўляе Менск суверэнітэту, паведамляе finanz.ru.

Расея, нагадаем, прапануе Беларусі перайсці да паўнавартаснай саюзнай дзяржавы, у тым ліку з адзінай валютай, дэ-факта патрабуючы ад Менска адмовіцца ад магчымасці друкаваць уласныя грошы і ўвязваючы з інтэграцыяй як вылучэнне свежай порцыі крэдытаў, так і выплаты старых.

Але нягледзячы на шматлікія перамовы і паездкі ў Менск кіраўніка Мінэканамразвіцця Максіма Арэшкіна і спікеркі Савета федэрацыі Валянціны Мацвіенкі, угаварыць Лукашэнку не атрымліваецца.

У нядзелю кіраўнік Беларусі і зусім усумніўся ў неабходнасці саюзнай дзяржавы. «Нам кожны год падсоўваюць новыя ўмовы. І ў выніку мы ў эканоміцы пастаянна нешта страчваем і страчваем. Каму патрэбны такі саюз?» - абурыўся Лукашэнка.

Масква не пускае на расейскі рынак некаторыя тыпы беларускіх тавараў, і Менск страчвае штогод па 9 млрд даляраў, заявіў ён, дадаўшы, што хоць Беларусь не плануе аб'яўляць Расеі гандлёвую вайну («як Амерыка з Кітаем»), гэта няправільна, бо кожны год «умовы пагаршаюцца».

Заявы Лукашэнкі з'яўляюцца спробай «нешта выгандляваць», заявіў у адказ Затулін з думскага камітэта ў справах СНД, дадаўшы, што такі падыход наўрад ці прывядзе да станоўчых вынікаў для беларускай эканомікі.

«Шчыра кажучы, я не бачу перспектывы для беларускай эканомікі, у выпадку калі яна перапыніць саюзныя стасункі з Расеяй. Гэта ў любым выпадку выкліча крызіс, - сказаў Затулін у інтэрв'ю радыёстанцыі «Говорит Москва».