ЕЗ: Беларусь згубіла магчымасць правесці выбары паводле міжнародных стандартаў
30- 18.11.2019, 20:22
- 45,219
У Брусэлі пракаментавалі лукашэнкаўскія «выбары».
У Еўрапейскім звязе лічаць, што «парламенцкія выбары» ў Беларусі не былі праведзены ў поўнай адпаведнасці з міжнароднымі стандартамі.
Пра гэта гаворыцца ў заяве спікера Еўрапейскай службы замежных дзеянняў.
«Учорашнія «парламенцкія выбары» ў Рэспубліцы Беларусь прайшлі агулам у спакойнай абстаноўцы. Тым не менш, гэта была страчаная магчымасць правесці выбары ў поўнай адпаведнасці з міжнароднымі стандартамі», - гаворыцца ў заяве.
Адзначаецца, што папярэдняя ацэнка Міжнароднай місіі АБСЕ/БДІПЧ назірання за «выбарамі» абвяшчае, што падчас «выбараў» агулам ігнараваліся асноўныя свабоды сходаў і выказвання меркаванняў.
Акрамя таго, БДІПЧ/АБСЕ адзначае, што была праведзеная абмежаваная колькасць кампаній у абмежавальным асяроддзі, якая ў цэлым не забяспечвала змястоўнага або канкурэнтнага палітычнага спаборніцтва.
«Шэраг ключавых рэкамендацый АБСЕ/БДІПЧ і Венецыянскай камісіі Рады Еўропы застаюцца без адказу. З прычыны прэзідэнцкіх выбараў 2020 года вельмі важна, каб беларускія ўлады неадкладна аднавілі працу па комплекснай выбарчай рэформе. Гэта таксама будзе мець ключавое значэнне для поўнага раскрыцця патэнцыялу стасункаў паміж ЕЗ і Беларуссю, які абапіраецца на пазітыўнае супрацоўніцтва апошніх трох гадоў», - адзначылі ў Брусэлі.