ЗША змянілі пазіцыю датычна ізраільскіх паселішчаў на Заходнім беразе

Біньямін Нетаньяху вітае новы падыход.

ЗША больш не ўважаюць, што будаўніцтва ізраільскіх цывільных паселішчаў на Заходнім беразе ракі Ярдан парушае міжнароднае права, заявіў у панядзелак, 18 лістапада, дзяржсакратар Майкл Пампеа. Гэтая пастанова, паводле ягоных словаў, была прынятая "пасля стараннага вывучэння аргументаў усіх бакоў дыскусіі" і адзначыла сабой змяненне палітыкі папярэдніх адміністрацый, якія з 1978 года прызнавалі, што паселішчы парушаюць міжнароднае права, паведамляе dw.com.

Ізраіль вітаў гэтыя выказванні Пампеа. Прэм'ер-міністр Ізраіля Біньямін Нетаньяху назваў іх выпраўленнем "гістарычнай памылкі" і заклікаў іншыя краіны далучыцца да ЗША.

Вярхоўная прадстаўніца Еўразвязу ў знешняй палітыцы і бяспецы Федэрыка Магерыні ўжо заявіла, што пазіцыя ЕЗ нязменная: селішчы "з'яўляюцца нелегальнымі з пункту гледжання міжнароднага права" і значна ўскладняюць прымірэнне бакоў на аснове суіснавання дзвюх дзяржаваў.

У лістападзе Суд Еўрапейскага звязу пастанавіў асабліва маркіраваць тавары, вырабленыя ў габрэйскіх паселішчах на акупаваных Ізраілем тэрыторыях. "Простае ўказанне на тое, што тавары вырабленыя ў дзяржаве Ізраіль, можа дэзінфармаваць спажыўцоў з нагоды таго факту, што Ізраіль прысутнічае на адпаведных тэрыторыях як акупацыйная дзяржава, а не як суверэнны суб'ект", – гаворыцца ў пастанове суда.

У пастанове адзначаецца, што інфармацыя наконт прадукту павінна дазваляць спажыўцам рабіць прадуманы выбар "не толькі на аснове медыцынскіх, эканамічных, экалагічных і сацыяльных чыннікаў, але і на аснове этычных меркаванняў". У Ізраілі назвалі гэтую пастанову дыскрымінацыйнай. ЗША таксама выказалі сваю заклапочанасць гэтай пастановай, паказаўшы, што яна садзейнічае кампаніі байкоту ізраільскіх тавараў.