Тысячы жыхароў Судана святкуюць канец панавання дыктатара Амара аль-Башыра
13- 12.04.2019, 9:17
- 11,991
Лукашэнка называў скінутага правадыра сваім сябрам і партнёрам.
У Судане, які беларускае кіраўніцтва называла стратэгічным партнёрам, адбыўся ваенны пераварот, паведамляе «Белсат».
Ці адыдуць у нябыт цяпер надзеі беларускага кіраўніцтва рэалізаваць у Судане кантракты на 250 мільёнаў даляраў? Якія шанцы падзарабіць мае Менск у іншых краінах Афрыкі?
«Ён сыходзіць! Слава Алаху!» - скандуюць жыхары Хартума каля брамы Міністэрства абароны. Амар аль-Башыр, які жалезнай рукой кіраваў Суданам 30 гадоў, адхілены ад улады.
Ахмед Авад ібн Аўф, міністр абароны Судана:
«Мы абвяшчаем спыненне агню ва ўсім Судане і неадкладнае вызваленне ўсіх палітычных зняволеных. Гэта створыць атмасферу для мірнага пераходу ўлады і арганізацыі палітычных партый, правядзення свабодных выбараў у канцы пераходнага перыяду і прыняцця новай Канстытуцыі».
Усяго за 9 дзён да пачатку хваляванняў аль-Башыр наведаў Менск. У супрацоўніцтве з ім Аляксандр Лукашэнка бачыў вялікія перспектывы:
«З мэтай паляпшэння разлікаў ва ўзаемным гандлі мы дамовіліся здабываць золата на вашай тэрыторыі. Вашы нетры вельмі багатыя гэты метал».
Золатам ахоплены крызісам Судан планаваў расплаціцца за пастаўленыя Менскам трактары і сталь. Іх у мінулым годзе прадалі на 12 мільёнаў даляраў. Пяць гадоў раней экспарт складаў 70 мільёнаў, з якіх 50 належалі да так званых закрытых пазіцый. Яўген Красулін, палітолаг:
«Галоўнае патрабаванне пратэстоўцаў, пры ўсёй іх эйфарыі і вітаннях вайскоўцаў, - гэта ўтварэнне грамадзянскага ўрада з прадстаўнікамі апазіцыі. Калі гэта адбудзецца, то тыя праекты, якія падпісваліся і планаваліся, будуць пад вялікай пагрозай».