Святар БАПЦ назваў гэтыя дзеянні ўлады ў Курапатах смяротным грахом
38- 7.04.2019, 13:14
- 43,467
Тыя, хто зруйнаваў крыжы, будуць гарэць у пекле.
Сёння на акцыі-малебне каля Свята-Духава сабора ў Менску айцец Леанід Акаловіч, настаяцель БАПЦ (Беларуская Аўтакефальная Праваслаўная Царква), назваў гэтыя дзеянні ўлады ў Курапатах «смяротным грахом». З ягоных слоў, яны будуць «гарэць у пекле», калі не адновяць крыжы.
Святар выказаў здзіўленне праз тое, што многія беларускія СМІ, якія называюць сябе «незалежнымі», нічога не паведамлялі аб набажэнстве.
Нагадаем, што 4 красавіка ўлады знеслі крыжы па перыметры Курапатаў.
Актывісты паведамляюць, што было знесена і вывезена блізу 100 крыжоў.
1 сакавіка на прэс-канферэнцыі Лукашэнка выказаў незадаволенасць крыжамі вакол Курапатаў, якія бачныя з дарогі.
Адзін з лідараў Беларускага Нацыянальнага Кангрэсу Мікола Статкевіч заклікаў выйсці ў нядзелю на малебен 7 красавіка а 12-й на плошчу Свабоды ля менскага Свята-Духава кафедральнага (праваслаўнага) сабора.
Сустаршыня Беларускай Хрысціянскай Дэмакратыі Павел Севярынец падтрымаў правядзенне набажэнства ў нядзелю каля менскага Свята-Духава кафедральнага сабора.