На пасаду генеральнага сакратара АДКБ вылучана кандыдатура прадстаўніка Беларусі Зася

Чым адкажа Арменія?

Рада міністраў замежных спраў краін АДКБ на пасяджэнні ў вузкім коле прыняла пастанову ўнесці на разгляд кіраўнікоў дзяржаў кандыдатуру прадстаўніка Беларусі Станіслава Зася на пасаду генеральнага сакратара арганізацыі з 1 студзеня 2020 года, заявіў кіраўнік МЗС Кыргызстана Чынгіз Айдарбекаў, адкрываючы ў Бішкеку сустрэчу кіраўнікоў МЗС АДКБ у пашыраным складзе, паведамляе «Интерфакс».

«Мы прынялі пастанову ўнесці кандыдатуру прадстаўніка ад Беларусі Станіслава Зася на разгляд кіраўнікоў дзяржаў Арганізацыі для прызначэння на пасаду генеральнага сакратара АДКБ з 2020 года», - сказаў Айдарбекаў.

Ён дадаў, што саміт кіраўнікоў дзяржаў АДКБ плануецца правесці ў Бішкеку 28 лістапада. З ягоных слоў, напярэдадні сустрэчы Рады калектыўнай бяспекі АДКБ адбудзецца чарговае пасяджэнне Рады міністраў замежных спраў арганізацыі.

Вакансія генеральнага сакратара АДКБ адкрылася ў 2018 годзе пасля таго, як Арменія датэрмінова адклікала свайго прадстаўніка Хачатурова, які адпрацаваў на гэтай пазіцыі паўтара года з прадугледжаных статутам трох гадоў. В.а. генеральнага сакратара стаў расейскі прадстаўнік Семерыкоў, які раней працаваў намеснікам генеральнага сакратара АДКБ.

Нагадаем, Арменія выступае супраць прызначэння прадстаўніка Беларусі на пасаду генеральнага сакратара АДКБ.