У Расеі чыноўнікі асвоілі новы спосаб браць хабары

Вырасла таксама колькасць тых прадпрымальнікаў, якія заявілі пра рост узроўню карупцыі.

У РФ чыноўнікі сталі радзей браць у бізнэса грошы проста за сваю добразычлівасць і часцей навязваюць платныя тавары і паслугі, высветлілі ў Гандлёва-прамысловай палаце Расеі, піша finanz.ru.

Набываць непатрэбныя тавары на ўказанне прадстаўнікоў улады стала даводзіцца 15% прадпрымальнікаў, больш за траціну з іх скардзяцца на тое, што сутыкаюцца з гэтай праблемай перыядычна, паведамляецца ў незалежным даследаванні «Бізнэс - барометр карупцыі».

Часцей за ўсё прадпрымальнікам навязваюць, фактычна, непатрэбныя паслугі пры атрыманні дазволаў, выкананні санітарна-эпідэміялагічных нормаў, у прыродаахоўнай сферы, напрыклад, пры вывазе цвёрдых бытавых адкідаў, а таксама пры падключэнні да інжынерных сетак, піша «Российская Газета». Напрыклад, прадстаўнікі пажарнай інспекцыі могуць «рэкамендаваць» прадпрымальніку для атрымання дазволу на дзейнасць замовіць у канкрэтнай фірмы супрацьпажарную апрацоўку памяшкання, дзе захоўваюцца незгаральныя шафы.

Раней, калі прадпрымальнікі скардзіліся на хабары гатоўкай, у якасці самай распаўсюджанай сумы называліся некалькі тысяч рублёў, то цяпер з распаўсюджваннем новай практыкі выдаткі бізнэсу выраслі. Траціна апытаных заявіла пра тое, што ім давялося ў выніку дадаткова выдаткавацца на суму да 50 тысяч рублёў, а кожны пяты - ад 50 да 500 тысяч рублёў. Карупцыя выходзіць з нізавога ўзроўню на ўзровень тых, хто прымае пастановы, канстатуе віцэ-прэзідэнт Гандлёва-прамысловай палаты Алена Дыбава.

Вырасла таксама колькасць тых прадпрымальнікаў, якія заявілі пра рост узроўню карупцыі - з 17% да 18% у параўнанні з папярэднім этапам, які праходзіў паўгода таму. Пры гэтым 37,5% заявілі аб тым, што ўзровень карупцыі не змяніўся. Раней доля такіх адказаў складала 33,4%.

Навязванне тавараў і паслуг парушае антыманапольнае заканадаўства, прычым іх кошт, як правіла, вышэйшы за рэальны рынкавы, паказвае прэзідэнт Гандлёва-прамысловай палаты Сяргей Катырын. Такая практыка азначае канфлікт інтарэсаў, бо чыноўнік фактычна рэкамендуе прадпрымальніку ўкласці дамову з канкрэтнай юрыдычнай асобай, дадае дырэктар дэпартамента дзяржаўнай палітыкі ў сферы дзяржаўнай і муніцыпальнай службы, процідзеяння карупцыі Мінпрацы Расеі Дзмітрый Баснак.