Дзяржаўны кантроль прызнаў крах «мадэрнізацыі» цэментных заводаў

На «мадэрнізацыю» было выдаткавана больш за мільярд даляраў.

Укладзеныя ў «мадэрнізацыю» цэментных заводаў дзяржаўныя сродкі не прынеслі належнай аддачы. Пра гэта заявіў старшыня Камітэта дзяржаўнага кантролю Леанід Анфімаў на пасяджэнні калегіі ўстановы, паведамляе БелТА.

Сёння на калегіі Камітэта дзяржаўнага кантролю разглядаюцца вынікі кантрольна-аналітычных дзеянняў у пытаннях эфектыўнасці работы арганізацый цэментнай прамысловасці. «На «мадэрнізацыю» цэментных заводаў дзяржавай выдаткаваныя каласальныя сродкі - больш за $ 1 млрд, на сотні мільёнаў даляраў была дадзеная дзяржаўная падтрымка. Чаканай аддачы ад гэтых сродкаў пакуль няма», - сказаў Леанід Анфімаў.

Ён падкрэсліў, што шэраг даручэнняў Лукашэнкі ў дачыненні да цэментнай прамысловасці не выконваецца. «Ёсць праблемы з рэалізацыяй Праграмы эфектыўнага выкарыстання магутнасцяў арганізацый цэментнай прамысловасці на 2015-2020 гады. Сёлета, пасля чарговай дзяржаўнай падтрымкі, назіраецца паляпшэнне асобных паказчыкаў працы, але не ў сітуацыі ў цэлым. Дагэтуль платаздольнасць і фінансавая ўстойлівасць арганізацый у поўнай меры не адноўленыя. А пазыкі ж заводаў адтэрмінаваныя, сумы выплат за крэдыты будуць расці з кожным годам», - адзначыў старшыня КДК.

Леанід Анфімаў звярнуў увагу на факты неабгрунтаванага пасярэдніцтва як пры закупе сыравіны і матэрыялаў, так і пры рэалізацыі цэменту, асабліва на ўнутраным рынку. «Страты заводаў вылічаюцца мільёнамі рублёў. Мяркую, што новае кіраўніцтва Беларускай цэментнай кампаніі ўжо расчалася з навядзеннем парадку і ў холдынгу, і ў арганізацыях, якія ўваходзяць у яго склад», - падкрэсліў ён.

Кіраўнік кантрольнага камітэта акцэнтаваў увагу на тым, што асноўная мэта пасяджэння калегіі - выпрацоўка ўзгодненых і ўсебакова пралічаных падыходаў для павышэння эфектыўнасці дзейнасці галіны.

Цяпер цэментная прамысловасць Беларусі прадстаўленая трыма заводамі: ААТ "Краснасельскбудматэрыялы", ААТ "Беларускі цэментны завод" і ААТ "Крычаўцэментнашыфер". Усе яны ўваходзяць у склад холдынгу "Беларуская цэментная кампанія". У 2012-2013 гадах на гэтых заводах рэалізаваныя вялікія інвестыцыйныя праекты, якія дазволілі ўвесці ў дзеянне сучасныя лініі вырабу цэменту сухім спосабам сумарнай гадавы магутнасцю 5,4 млн т. На мадэрнізацыю трох прадпрыемстваў было выдаткавана блізуя $ 1,1 млрд.

Увод у эксплуатацыю і асваенне новых энэргаэфектыўных магутнасцяў дазволілі абнавіць асноўныя фонды, павялічыць прадукцыйнасць працы, знізіць энэргаёмістасць вытворчасці, істотна павялічыць аб'ёмы экспарту цэменту.

Для фінансавага аздараўлення цэментнай галіны кіраўніком дзяржавы сёлета прыняты ўказ, які прадугледжвае адтэрміноўку і растэрміноўку выплат за спажытыя энэргарэсурсы, а таксама абавязанняў перад нацыянальным бюджэтам і банкамі. Гэта дазволіла трохі палепшыць паказчыкі дзейнасці цэментных заводаў за першае паўгоддзе. Так, чысты прыбытак атрыманы ААТ «Крычаўцэментнашыфер» і ААТ «Беларускі цэментны завод», адчувальна зніжаныя чыстыя страты ААТ «Краснасельскбудматэрыялы».