Грузія заявіла пра маштабную кібератаку Генштаба Узброеных сіл Расеі

Яна адбылася 29 кастрычніка 2019 года.

Генеральны штаб Узброеных сіл Расеі ў кастрычніку 2019 года правёў буйнамаштабную кібератаку супраць дзяржаўных і прыватных устаноў Грузіі.

Як паведамляе "Еўрапейская праўда", пра гэта гаворыцца ў заяве на сайце МЗС Грузіі.

Са звестак структуры, 28 кастрычніка 2019 года была ўчыненая буйнамаштабная кібератака на сайты, сэрверы і іншыя аперацыйныя сістэмы Адміністрацыі прэзідэнта Грузіі, судоў, розных муніцыпальных сходаў, дзяржаўных органаў, арганізацый прыватнага сектара і сродкаў масавай інфармацыі.

У выніку кібератакі сэрверы і аперацыйныя сістэмы гэтых арганізацый былі значна пашкоджаныя, што сур'ёзна адбілася на іх функцыянальнасці.

"Згаданая вышэй кібератака была нацэленая на нацыянальную бяспеку Грузіі і мела мэтай прычыніць шкоду грамадзянам Грузіі і ўрадавым структурам, парушыўшы і паралізаваўшы функцыянаванне розных арганізацый, што выклікала занепакоенасць у шырокай грамадскасці", - гаворыцца ў заяве.

Паводле інфармацыі МЗС, расследаванне, праведзенае грузінскімі ўладамі, разам з інфармацыяй, сабранай у выніку супрацоўніцтва з партнёрамі, паказала, што гэтая кібератака была спланаваная і праведзеная Галоўным падраздзяленнем Генеральнага штаба Узброеных Сіл Расейскай Федэрацыі.

"Грузія асуджае гэтую кібератаку, якая ідзе насуперак з міжнароднымі нормамі і прынцыпамі, і яшчэ раз пасягае на суверэнітэт Грузіі, каб перашкодзіць еўрапейскай і еўраатлантычнай інтэграцыі краіны і яе дэмакратычнаму развіццю", - гаворыцца ў заяве.