У Расеі пенсіянерка адправіла Пуціну свой дадатак да пенсіі
20- 20.02.2020, 19:42
- 23,503
Пенсіянерка з Чэлябінска заявіла, што ўважае такое «павелічэнне» пенсіі абразлівым.
Чэлябінская пенсіянерка Алена Карпеня адправіла прэзідэнту Расеі Уладзіміру Пуціну прыбаўку да сваёй пенсіі, якая складае 1 рубель 10 капеек. Пра гэта 18 лютага паведаміла расейскае выданне «74.ru».
Адзначаецца, што такім чынам пенсіянерка хацела выказаць незадаволенасць сумай, якую ёй дадалі ў выніку індэксацыі пенсіі.
Падобную прыбаўку жанчына назвала «абразлівай» і дадала, што толькі за адпраўку грашовага пераказу ёй давялося заплаціць 81 рубель.
Выданне піша, што Карпеня суправадзіла свой банкаўскі пераказ наступным паведамленнем: «Вялікі дзякуй за студзеньскую індэксацыю (1 рубель) настаўнік 33 г. стажу».
У каментары выданню, жанчына распавяла, што 33 гады працавала настаўніцай ангельскай мовы і першапачаткова яе пенсія была 7200 рублёў, у снежні мінулага года - 9224 рублёў, а сёлета - 9225 рублёў.
Пенсіянерка адзначыла, што «лепш бы нічога не рабілі, чым так зневажаць людзей».
На сітуацыю адрэагавалі ў Крамлі. Між іншым, прэс-сакратар Пуціна Дзмітрый Пяскоў заявіў, што нельга на канкрэтным прыкладзе рабіць абагульненні, піша «Московский комсомолец».