Як кіраўніцтва спраў Лукашэнкі зарабляе мільёны на нерухомасці

Кіраўніцтва спраў валодае сотнямі будынкаў, а кіруе КСП даўні сябар узурпатара.

- Мы з'яўляемся самым буйным аператарам на рынку нежылой нерухомасці ў Рэспубліцы Беларусь, - паведамляецца на сайце Галоўнай гаспадарчай управы кіраўніцтва спраў лукашэнкі (ГГУ КСП). І гэта не той выпадак, калі беларускія ўлады прыпісваюць сабе дасягненні. Прыкметная частка офіснай нерухомасці ва ўсіх раёнах Менска належыць менавіта ГГУ, паведамляе euroradio.pl.

Зрэшты, ГГУ аперуе нерухомасцю не толькі ў сталіцы, а па ўсёй краіне. Але менавіта менскія будынкі ўяўляюць найбольшую цікавасць, бо ў сталіцы сканцэнтраваная вялікая частка беларускага бізнэсу і, такім чынам, грошай.

Дзясяткі аб'ектаў

Паглядзіце на мапу - на ёй адзначаныя будынкі, якім валодае ГГУ і ў якіх ёсць вольныя плошчы для арэнды. Яны ёсць у кожным раёне Менска, а самі памяшканні можна падабраць на ўсякі густ.

Напраўду нават у Менску ля ГГУ будынкаў больш: журналісты адзначылі тыя, якія цяпер даступныя для арэнды. Ёсць і іншыя, занятыя будынкі.

Кошт арэнды цалкам дэмакратычны: напрыклад, квадратны метр у будынку на вуліцы Карла Маркса каштуе амаль 24 рублі на месяц. Блок з некалькіх кабінетаў агульнай плошчай 52 метры каштуе прыблізна 1250 рублёў.

Для параўнання: за такі ж офіс у рэнавіраваным будынку на Веры Харужай (там жа, дзе размяшчаўся штаб Віктара Бабарыкі) давядзецца выкласці ўдвая больш. Зрэшты, рамонт там лепшы, чым у большасці будынкаў, якія здаюцца ГГУ. Ёсць і яшчэ адзін нюанс, пра яго - далей.

У многіх будынках ГГУ КСП размяшчаюцца дзяржаўныя структуры або арганізацыі. Напрыклад, на Маркса, 15 працуе ўправа дэпартамента гуманітарнага супрацоўніцтва, а на Маркса, 16 - аддзяленне «Беларусбанка» і Федэрацыя сучаснага пяціборства. Абодва будынкі, дарэчы, уяўляюць гісторыка-культурную каштоўнасць - як і шэраг іншых будынкаў, якія належаць ГГУ.

Арандуюць плошчы каля ГГУ і шматлікія прыватныя арганізацыі. Але гэта нядзіўна: офісных будынкаў у Менску, не звязаных з гэтай структурай, не так і шмат. Менш, чым ахвочых.

Мільённыя абарачэнні

Кіраўнік КСП Віктар Шэйман у пачатку студзеня адрапартаваў аб росце прыбытку падшэфнай структуры да 2,6 мільярда рублёў. Паводле цяперашняга курсу гэта блізу мільярд даляраў. Праўда, аб'ём чыстага прыбытку ён не агучыў. Як і статыстыку ў розных накірунках дзейнасці.

ГГУ належыць блізу чатырыста сотняў будынкаў па ўсёй краіне. Якая іх агульная плошча і які адсотак ад яе займаюць дзяржаўныя органы, ведаюць толькі ў самым ГГУ. Але ўявіць аб'ёмы прыбытку можна нават на адным прыкладзе.

Бізнэс-цэнтр «XXI стагоддзе» размешчаны на праспекце Незалежнасці, недалёка ад станцыі метро Барысаўскі тракт. Будынак быў пабудаваны ў 1997-м і стаў першым у краіне бізнэс-цэнтрам і адным з першых будынкаў з маштабным выкарыстаннем шкла на фасадзе.

Агулам «квадрат» тут каштуе блізу 20 рублёў, а на сёння свабодна ўсяго крыху больш за 500 метраў. Калі і іх зоймуць - гэта плюс 10 тысяч рублёў на месяц. Агулам жа плошча бізнэс-цэнтра складае 17,8 тысячы метраў.

Зразумела, прыкметная частка - не арэндаваныя памяшканні, але нават калі здавацца будзе толькі палова, месячны прыбытак складае дзясяткі тысяч даляраў. І гэта толькі адзін будынак.

З улікам колькасці будынкаў можна выказаць здагадку, што агульны месячны прыбытак ад арэнды вылічаецца лікамі як мінімум з шасцю нулямі. Пры гэтым выдаткі мінімальныя: пераважная большасць будынкаў былі проста перададзеныя ГГУ. У рэспубліканскую ж уласнасць яны патрапілі «па спадчыне» ад БССР. А абслугоўвае будынкі іншая структура.

Але не ўсе плацяць за размяшчэнне ў будынках ГГУ: ад гэтага вызваленыя падначаленыя прэзідэнту або ўраду арганізацыі і яшчэ некаторыя, пералічаныя ва ўказе Лукашэнкі.

...і спадарожныя паслугі

Калі вам здаецца, што арэнда ў будынках КСП танная і ад гэтага самая выгадная, то гэта не зусім так. Калісьці КСП сапраўды зазнала крытыку Лукашэнкі за занадта нізкія цэны і відавочны дэмпінг. Але сёння сістэма выбудаваная хітрэй.

Кожны арандатар будынкаў, якія належаць структуры, мусіць укладаць яшчэ адну дамову - з РУП «БелЭЗ». Гэтая арганізацыя таксама ўваходзіць у кіраўніцтва спраў Лукашэнкі. Яна займаецца пытаннямі, звязанымі з эксплуатацыяй будынкаў: наймае дворнікаў і вахцёраў, падтрымлівае плошчы ў прыстойным стане.

Праўда, многія арандатары скардзяцца: нават зламаныя аконныя рамы рамантаваць трэба самім, у туалетах няма мыла і гарачай вады. Ды і агулам многія памяшканні маюць патрэбу ў рамонце.

Сёння РУП «БелЭЗ» абслугоўвае 864 будынкі па ўсёй Беларусі. Іх агульная плошча амаль 1,7 мільёна (!) квадратных метраў.

Паслугі «БелЭЗ» не бясплатныя: у некаторых будынках у цэнтры горада за квадратны метр аплата даходзіць да 11 рублёў на месяц. Вядома, ёсць і іншыя кошты: для некаторых будынкаў - нават менш рубля. Але абарачэнне цалкам атрымліваецца немаленькім і пры гэтым, мяркуючы з усяго, высока маржынальным.

Атрымліваецца, толькі дзякуючы гэтым дзвюм структурам Кіраўніцтва спраў мае велізарныя фінансавыя абарачэнні.