Столтэнберг: Не Расеі вырашаць, хто будзе сябрам NATO

Расея не мае права нават спрабаваць паўплываць на працэс уступлення якой-небудзь дзяржавы ў NATO.

Расея не мае права вырашаць, якая дзяржава можа ўступіць у Паўночнаатлантычны Альянс, а якая не. Пра гэта генеральны сакратар NATO Енс Столтэнберг нагадаў 18 студзеня, размаўляючы па відэасувязі з удзельнікамі навуковай канферэнцыі, якая трансліравалася ў YouTube на канале NATO, паведамляе gordonua.com.

«У Расеі няма права нават спрабаваць умешвацца, блакаваць або спыняць сяброўства суверэннай дзяржавы ў NATO», - падкрэсліў ён.

Такія рашэнні павінны прымаць сама дзяржава і хаўруснікі па NATO, сказаў Столтэнберг.

«Для мяне ставіць пад пытанне права суверэннай дзяржавы вырашаць сваю ўласную будучыню - гэта амаль правакацыя. Гэта як бы нанава прыняць [падзел свету на] сферы ўплыву, прыняць, што вялікія краіны маюць свайго роду ўплыў над суседзямі. Я не хачу жыць у такім свеце , таму што я родам з маленькай краіны, якая суседнічае з вялікай краінай. Калі мы прымем, што вялікія краіны могуць вырашаць, што могуць або не могуць рабіць малыя суседзі, тады мы вернемся ў старыя часы. Мы не хочам такога свету. Нам патрэбны мір , які будуецца на правілах, на павазе для нацый, незалежна ад памеру ўзброеных сіл, эканомік ці чаго заўгодна. Гэта - фундаментальна, і калі мы пачнём у дачыненні да гэтага шукаць кампрамісы, то мы будзем на вельмі небяспечным шляху да месца, у якім мы не хочам апынуцца», - падкрэсліў генеральны сакратар.

Ён працягнуў, што Грузія хоча быць сябрам NATO, і «не Расеі гэта спыніць».

«Будзе ці не Грузія сябрам - гэта вырашаць Грузіі і хаўруснікам, і толькі ім. Таму што ўсё астатняе будзе замахам на суверэнныя правы суверэннай незалежнай дзяржавы. [...] Тое, што [Расея] зрабіла, парушаючы тэрытарыяльную цэласнасць і незалежнасць Грузіі - непрымальна. Тое ж самае тычыцца, вядома, і Украіны: незаконная анэксія Крыма, дэстабілізацыя Данбаса на ўсходзе Украіны парушае фундаментальныя прынцыпы, дзякуючы якім мы ствараем мірны і стабільны свет», - дадаў Столтэнберг.