«Працягваем змагацца за самае галоўнае і каштоўнае»

Народ згуртаваўся супраць банды.

«Мы не палітыкі, не лідары, не прадстаўнікі грамадскіх арганізацый. Мы проста людзі, якія звяртаюцца да вас па дапамогу, - пішуць чытачы тэлеграм-канала «Баста!». - Нашых родных, сяброў, знаёмых і незнаёмых людзей, кожны з якіх для нас важны і каштоўны, крадуць з уласных дамоў, часам у адной піжаме, у сваіх жа дварах, пакідаючы вазкі з дзецьмі на дварэ, у парках падчас шпацыру. На вачах у дзяцей іх збіваюць і вязуць людзі без якіх-небудзь тлумачэнняў. Сваякі па некалькі дзён часам не могуць даведацца, дзе знаходзіцца чалавек.

Перадачы забароненыя, у найлепшым выпадку атрымліваецца перадаць медыкаменты і тое, калі яны жыццёва неабходныя. Людзі спяць без матрацаў і з яркім, пастаянна уключаным святлом. Часам па 24 чалавекі ў камеры, разлічанай на 6 чалавек. У камерах часта адсутнічае гарачая вада. Перакрыты доступ паветра нават з калідора. Шпацыры бываюць рэдка. Людзі масава захворваюць на каранавірус, але нават маскі перадаць немагчыма.

Пра ўсё гэта заяўлялі ўжо не раз, як і пра тое, якая колькасць людзей з вясны 2020 года знаходзіцца пад катаваннямі.

Мы хочам максімальна данесці да грамадскасці, што ад адчаю людзі сталі галадаць. Ігар Лосік галадаў 42 дні. Ужо 4 дні галадае, адмаўляючыся нават ад вады, чалавек з інваліднасцю, якога пасадзілі на 25 дзён. Яго проста забралі ў парку і абвінавацілі ва ўдзеле ў несанкцыянаваным мерапрыемстве, якога ў прынцыпе не было, а таксама ў непадпарадкаванні супрацоўнікам міліцыі. Усё таму, што ён адмовіўся запісваць відэа з прызнаннем сваёй віны для далейшага паказу на дзяржаўных СМІ.

У турмах сядзяць людзі сталага веку, маці малалетніх дзяцей. Па ўсёй краіне ідуць суды, пастановы якіх на гады садзяць за краты за знятую з твару сілавіка маску, за надпіс, за выказанае меркаванне. Ніводнай крымінальнай справы паводле фактаў катаванняў і забойстваў не заведзеная.

Мы працягваем змагацца за самае галоўнае і каштоўнае - чалавечыя жыцці, якія адымае рэжым Лукашэнкі і яго банда злачынцаў і гвалтаўнікоў. Яны называюць сябе праваахоўнымі органамі, а па сутнасці з'яўляюцца тэрарыстамі, якія знішчаюць уласны народ».