Чаму ў Менску скасавалі парад на 9 траўня?

Калі ўвесь час турбаваць «духа пераваротаў», то ён абавязкова матэрыялізуецца.

Расейскі палітолаг Андрэй Суздальцаў на сайце politoboz.com аналізуе заяву Лукашэнкі аб тым, што палітолаг Аляксандр Фядута, кіраўнік партыі БНФ Рыгор Кастусёў і Юры Зянковіч былі датычныя да планавання замаху на яго і ягоных сыноў. Дыктатар таксама заявіў, што за падрыхтоўкай замаху стаялі спецслужбы і кіраўніцтва ЗША:

- Відэа і запіс zoom'а робіць уражанне. Змова, без усялякіх сумневаў, была, але развівалі ідэю захопу ўлады, арышту чальцоў беларускага ўрада, блакавання Менска (аўтар цытуе праз відэа сустрэчы ў кавярні) нейкія аматары і наіўныя летуценнікі. Дзіцячы садок нейкі... Так змовы не робяць. Змоўшчыкі хоць бы разумныя кніжкі чытаюць. Можна параіць выдадзенае ў 2021 годзе Расейскім фондам спрыяння адукацыі і навуцы ў Маскве, навучальны дапаможнік Эдварда Лютвака «Дзяржаўны пераварот. Практычны дапаможнік». Пераплёт цвёрды (!). Акрамя таго, аўтар гэтых радкоў неяк не бачыць у арыштаваных арганізатараў вайсковага бунту. Тое, пра што казалі гэтыя людзі ў zoom'е і ў кавярні, у Беларусі кажуць усе, пагалоўна. Гэта звычайныя кухонныя размова мільёнаў грамадзян краіны. Усіх саджаць?

Такім чынам, аўтар гэтых радкоў усё ж такі ўважае за свой абавязак выказаць сумнеў у тым, што арыштаваныя нясуць нейкую пагрозу нацыянальнай бяспецы Рэспублікі Беларусь. Людзі гэтыя вядомыя сваімі адназначна антыўрадавымі палітычнымі поглядамі, але наўрад ці яны здольныя да нейкай арганізаванай дзейнасці супраць існага ў РБ палітычнага рэжыму. Прычым абодва арыштаваныя заўсёды былі вядомыя сваёй выключнай жартаўлівасцю і імкненнем надаць уласным персонам відавочна завышаную палітычную значнасць і ўплывовасць на міжнароднай арэне і ў той жа Маскве.

Аднак расейскі палітолаг звяртае ўвагу на тое, што Лукашэнка ўсё ж такі баіцца паўтарыць лёс егіпецкага прэзідэнта Анвара Садата, пра якога размаўлялі «змоўшчыкі»:

- Лукашэнка, раптам усвядоміўшы, што 9 траўня 2021 года можа выйсці увесь Менск, святочны парад проста скасаваў. У прынцыпе, чакалася, што беларускі дыктатар будзе ківаць на «трэцюю хвалю» COVID-19, што, адразу скажам, выглядала б вельмі непераканаўча. У 2020 годзе, калі ў свеце ніякай вакцыны яшчэ не было, Лукашэнка тройчы абвяшчаў «перамогу» над каранавірусам. Пры гэтым апазіцыйныя маршы забараняліся з прычыны эпідэміі, а праўрадавыя стымуляваліся, што дазволіла сцвярджаць, што прыхільнікі Лукашэнкі вірусам не заражаюцца. Некаторыя афіцэры нават пачалі перадаваць гэты незвычайны «зарад энэргіі і рашучасці» поціскам рукі...

Але вось цяпер, калі, відавочна, ужо ўся краіна павінна быць прышчэпленая, бо вакцыны гаць гаці (Лукашэнка гатовы ўжо яе паставіць у Азербайджан), раптам прыйшла «трэцяя хваля».

Але, у выніку, з 9 траўня ўсе становіцца на «месца». Будзе абвешчана, што з прычыны змовы або падрыхтоўкі бунту парада не будзе. За гэта давядзецца падзякаваць Фядуту, узгадаць у zoom'е аб забойстве 6 кастрычніка 1981 года прэзідэнта Эгіпту Анвара Садата проста на святочным парадзе.

Андрэй Суздальцаў мяркуе, што калі ўвесь час закранаць тэму бунту і змовы, то яна калі-небудзь з плоскасці размоў пяройдзе ў рэальнасць:

- З'яўленне змоў, а далей і тэрарыстычных актаў, з'яўляецца індыкатарам таго, што раскол у беларускім грамадстве набыў невыносны для дзяржавы характар. Яна можа існаваць, але развівацца не зможа. Пастаянныя пагрозы змоў, мецяжоў і тэрарыстычных актаў паралізуюць беларускую дзяржаву.

Беларускія ўлады не разумеюць, што, раздзімаючы і правакуючы бунты і змовы, пастаянна ствараючы ілюзію тэрарыстычнай пагрозы, яны хапаюцца за двухбаковае вострае лязо і актыўна выклікаюць «духаў» з крывавай бездані. Няма сумненняў, што гэтыя «духі» абавязкова матэрыялізуюцца і прыйдуць... І што тады будзе рабіць заслужаны рэжысёр Белівуда Іван Церцель?