Літва: ЕЗ павінен абмеркаваць новыя санкцыі супраць РФ да таго, як яна перасячэ «чырвоную лінію»
- 19.04.2021, 18:11
- 2,422
Сігнал Расеі павінен быць дакладным, моцным і хуткім.
Кіраўнік МЗС Літвы Габрыэлюс Ландсбергіс уважае, што ЕЗ павінен абмяркоўваць новыя санкцыі супраць Расеі, не чакаючы, пакуль яна пойдзе ў наступ супраць Украіны.
Пра гэта ён заявіў пасля відэаканферэнцыі міністраў замежных спраў краін ЕЗ, паведамляе Delfi.
Міністр заклікаў Расею ўстрымацца ад эскалацыі на ўсходзе Украіны.
«Стаўленне і пазіцыя Украіны вельмі спакойныя, мэтанакіраваныя і вартыя павагі», - адзначыў ён.
Ландсбергіс таксама падкрэсліў, што санкцыі трэба абмеркаваць да перасячэння «чырвоных ліній».
«Я прапанаваў, каб санкцыі, асабліва ў выпадку з Украінай, разглядаліся не толькі пры перасячэнні «чырвоных ліній», гэта значыць калі атака ўжо пачалася фізічна і будзе позна садзіцца і думаць пра тое, што Еўропа можа сказаць. Трэба паслаць сігнал сёння: мы гатовыя гаварыць пра сектаральныя санкцыі, калі «чырвоныя лініі» будуць перасечаныя. Сігнал павінен быць дакладным, моцным і хуткім», - сказаў міністр.