Парламенцкая асамблея Рады Еўропы адмовілася прызнаваць Пуціна легітымным

А кіраўніка Крамля - вінаватым у смерці Аляксея Навальнага.

Парламенцкая асамблея Рады Еўропы адмовілася прызнаваць Уладзіміра Пуціна легітымным прэзідэнтам РФ, вынікае з апублікаванай на сайце ПАРЕ рэзалюцыі. У дакуменце сказана, што Пуцін у 2024 годзе стаў прэзідэнтам у выніку выбараў, якія не былі свабоднымі і сумленнымі, а рэжым Пуціна названы «схільным да вайны з дэмакратыяй». У ПАРЕ заклікалі краіны Еўропы спыніць усе кантакты з Расеяй, акрамя гуманітарных, піша The Moscow Times.

«Ніводнаму сапраўднаму апаненту Уладзіміра Пуціна нават не было дазволена балатавацца. Больш за тое, выбарчыя ўчасткі для гэтых выбараў былі адкрытыя на суверэннай украінскай тэрыторыі, часова акупаванай Расейскай Федэрацыяй, і ў малдаўскіх адміністрацыйна-тэрытарыяльных адзінках Левабярэжжа Днястра, што з'яўляецца грубым парушэннем Статута ААН і прынцыпу суверэнітэту, палітычнай незалежнасці і тэрытарыяльнай цэласнасці ўсіх дзяржаў», - гаворыцца ў рэзалюцыі.

У ПАРЕ дадалі, што Расея «паступова ператварылася ў дзяржаву, якая сёння забараняе існаванне ўсякай палітычнай апазіцыі», а ўнутры самой краіны «з дапамогай прапаганды ў фашысцкім стылі» быў укаранёны «культ асобы вакол фігуры Уладзіміра Пуціна».

У рэзалюцыі таксама асудзілі рэжым Пуціна за «абвяшчэнне вайны ўласнаму народу». «Карэнныя народы, нацыянальныя і этнічныя меншасці ў Расейскай Федэрацыі гвалтоўна русіфікуюцца, зазнаюць рэпрэсіі і дыскрымінацыю ў парушэнне абавязацельстваў Расейскай Федэрацыі па Міжнароднай канвенцыі аб ліквідацыі ўсіх форм расавай дыскрымінацыі», - сказана ў тэксце. У Асамблеі адзначылі «непрапарцыйна высокія страты, панесеныя воінскімі часткамі, якія складаюцца з вайскоўцаў», прызваных з нацыянальных рэспублік, і назвалі гэта «мэтанакіраванай кампаніяй» па ліквідацыі «нацыянальнай і этнічнай разнастайнасці» ўнутры Расеі.

ПАРЕ асудзіла практыку расейскіх уладаў уносіць палітычных апанентаў у спісы тэрарыстаў і экстрэмістаў і выказала занепакоенасць праз даручэнне Пуціна ФСБ «ужыць рашучыя захады супраць ворагаў краіны», бо гэта можа справакаваць чарговыя палітычныя забойствы як унутры РФ, так і за яе межамі.

У рэзалюцыі Пуцін прызнаецца вінаватым у забойстве Аляксея Навальнага, таксама дакумент змяшчае заклік расследаваць смерць апазіцыянера з прыцягненнем міжнароднай камісіі. «За апошнія два дзесяцігоддзі былі забітыя людзі, якія выступалі супраць жалезнай рукі Уладзіміра Пуціна ў Расейскай Федэрацыі, звычайна пры ўдзеле расейскіх спецслужбаў або асоб, якія дзейнічаюць на іх указанне», — заявілі ў ПАРЕ.

У Асамблеі запатрабавалі ўзмацніць антырасейскія санкцыі, надаць вайсковую дапамогу Украіне, стварыць міжнародны механізм выплат для пацярпелых ад баявых дзеянняў ва Украіне, стварыць спіс краін, а таксама фізічных і юрыдычных асоб, якія дапамагаюць Маскве абыходзіць санкцыі і працягваць вайну ва Украіне, прызнаць РПЦ «інструментам расейскага ўплыву», якая не мае нічога агульнага з рэлігіяй.