BILD: Столтэнберг таемна сустрэўся з кіраўніцай МЗС Нямеччыны

Сярод тэмаў была дапамога Украіне.

У чацвер, 25 красавіка, кіраўніцу МЗС Нямеччыны Аналену Бербок заўважылі падчас сакрэтнай сустрэчы з генеральным сакратаром NATO Енсам Столтэнбергам.

Як піша Bild, яны праседзелі ў рэстаране гатэля Telegraphenamt у Берліне амаль тры гадзіны. Іх знайшоў фатограф выдання Міхаэль Кернер. Пасля прысутныя расказалі яму, што «дыскусія была крыху гарачай».

Як стала вядома выданню, Столтэнберг папрасіў Бербок пра размову і абмеркаваў з ёй бяспеку Еўропы і далейшую дапамогу Украіне.

З 25 красавіка генеральны сакратар NATO знаходзіцца ў Нямеччыне для падрыхтоўкі да саміту Альянсу ў Вашынгтоне ў ліпені. Перад гэтым ён пабываў у Польшчы, дзе гаварыў з прэм'ер-міністрам Дональдам Тускам пра стрымліванне і абарону, а таксама пра падтрымку Украіны.