Прэзідэнт Сербіі адмовіўся ад сяброўства ў БРІКС

Краіна накіраваная на ўступленне ў ЕЗ.

Сербія не стане далучацца да блока БРІКС, у якім знаходзіцца Расея, бо краіна накіраваная на ўступленне ў Еўразвяз, заявіў прэзідэнт Сербіі Аляксандр Вучыч.

Так ён адказаў на высновы эксперта Амерыканскага інстытута прадпрымальніцтва (American Enterprise Institute) Іваны Страднер, якая заявіла аб тым, што сербскі прэзідэнт «марыць адмовіцца ад шляху ў Еўразвяз дзеля сяброўства ў БРІКС», адзначае The Moscow Times.

«Адкуль яна ведае, пра што я думаю. Хіба яны мне ўсталявалі нейкі чып і зараз займаюцца тым, што чытаюць мае думкі, што мне сніцца і аб чым мару? Яны што звар'яцелі ўсе разам? <…> Я выключна паважаю БРІКС, але Сербія знаходзіцца на еўрапейскім шляху, і Сербія на ім застанецца», - сказаў Вучыч.

З яго слоў, крыніцамі такіх разваг з'яўляецца «расейскі Telegram». Вучыч адзначыў, што многія спрабуюць саштурхнуць Сербію з еўрапейскага шляху, але яна застаецца на ім «спецыяльна, каб яны нерваваліся».

Сербія можа ўступіць у ЕЗ праз год, два ці тры - тэрміны залежаць «не ад нас, але ад іх», падкрэсліў кіраўнік рэспублікі. Бялград падаў заяўку на ўступленне ў ЕЗ у 2009 годзе. З 2012-га ў Сербіі ёсць афіцыйны статус кандыдата на ўступленне ў ЕЗ.

Старшыня Еўрарады Шарль Мішэль заяўляў, што ЕЗ і кандыдаты ў яго павінны паставіць для сябе «выразную мэту» і быць гатовымі да пашырэння да 2030 года. З яго слоў, дагэтуль да блока могуць далучыцца балканскія краіны, у тым ліку Сербія.

У 2023 годзе пасля перамогі кааліцыі Вучыча на парламенцкіх выбарах ён паабяцаў «працягнуць падарожжа» Сербіі ў Еўропу.