У Тбілісі жорстка збілі лідараў апазіцыі
31- 1.05.2024, 17:06
- 10,556
Паліцыя ўжыла спецсродкі супраць пратэстоўцаў.
У сацсетках распаўсюджваецца фатаграфія старшыні «Нацыянальнага руху» Левана Хабеішвілі з траўмамі ў сківічна-тварнай вобласці. У апазіцыянера разбітае брыво, сіняк пад вокам і відавочна пераламаны нос і выбіты зуб, паведамляе «Радыё Свабода».
Аднапартыйцы Хабеішвілі сцвярджаюць, што ён быў жорстка збіты паліцыянтамі на акцыі супраць закона аб «замежных агентах».
Сам Хабеішвілі з клінікі распаўсюдзіў у сацсетках відэазварот, у якім заявіў:
«Нічога ў мяне не баліць. Вока пройдзе, цела і ўсё пройдзе, барацьба з пуціністамі павінна працягвацца».
Пацярпеў ад рук паліцыянтаў і лідар палітычнага аб'яднання «Грамадзяне» Алека Элісашвілі, на відэакадрах, захаваных рознымі СМІ відаць, як ён падыходзіць да паліцыянтаў і яны кідаюць яго на зямлю.
«Мяне таксама пацягнулі, але калі я ўбачыў фатаграфію Левана… Не важна, якую партыю я прадстаўляю, нельга так абыходзіцца з дэпутатам, нельга абыходзіцца з ім як з сабакам», - сказаў Элісашвілі.
Да гэтага некалькі паліцыянтаў паспрабавалі напасці і на лідара партыі «Стратэгія Агмашэнэбелі» Георгія Вашадзэ.
«Яны спрабавалі мяне схапіць, стралялі ў мяне прыцэльна. Чаму яны страляюць? Што ім патрэбнае? Яны не могуць вытрымаць гэтага пратэсту народа. У іх была спецыяльная група, яны збіраліся «ўзяць» мяне разам з Леванам Хабеішвілі, але там былі камеры і, відавочна, яны не наважыліся на гэта», - заявіў Вашадзэ.
Тэлекампанія «Формула» паведамляе, што падчас разгону акцыі пратэсту ў цэнтры Тбілісі збіты амерыканскі адвакат Тэд Джонас. Паводле звестак СМІ, грамадзянін ЗША зазнаў фізічны гвалт з боку сілавікоў - мужчыну выбілі зубы, у яго пералом носа.
Нагадаем, што ў ноч на 1 траўня, падчас разгону мітынгоўцаў паліцыянты ўжылі спецсродкі.