У Менску 52-гадовая безбілетніца збіла кантралёра

Чым гэта скончылася для яе?

У Менску судзілі 52-гадовую жанчыну, якая дала адпор кантралёру грамадскага транспарту.

У той дзень у аўтобусе ў яе не быў аплачаны праезд, паведамляе агенцтва "Мінск-Навіны".

Кантралёры папрасілі мянчанку выйсці на найбліжэйшым прыпынку. Яна так і зрабіла, але паведаміць свае звесткі для афармлення пратакола аб адміністрацыйным правапарушэнні адмовілася.

Затым жанчына паспрабавала ўцячы, але працаўніца "Мінсктранса" стала ўтрымліваць яе за ручку торбы: трэба было дачакацца прыезду супрацоўнікаў міліцыі.

У спробе вызваліцца зламысніца пхнула яе некалькі разоў у плечы, а пасля збіралася ўцячы. Але кантралёры не планавалі адпускаць парушальніцу, ды і яе супрацьпраўныя дзеянні знялі відэарэгістратары.

На мянчанку пачалі крымінальную справу. Жанчына, якая працуе загадчыцай крамы і раней не прыцягвалася да крымінальнай адказнасці, поўнасцю прызнала віну і раскаялася ў зробленым.

Ёй прызначанае пакаранне ў выглядзе года папраўчых работ з утрыманнем у даход дзяржавы 25% з заробку на асноўным месцы працы. Таксама абвінавачаная павінна выплаціць пацярпелай 300 рублёў у якасці кампенсацыі маральнай шкоды.